ನಾನು ನಾನಾಗುವ ಆಸೆಯ
ಹಂಚಿಕೊಳ್ಳುವ ಭಾವವ
ಹುಡುಕುತ ಹೋದ ನಾ,
ಸಿಕ್ಕಿಬಿದ್ದೆ ಒಂದು ಒಗಟಿನಲ್ಲಿ!
ನನ್ನಾಸೆಯ ಮನಕೆ
ನನ್ನೆದೆಯ ಕೋರಿಕೆಗೆ
ನನಗಿರುವ ನೆನಪಿನ
ತಿರುಗುಬಾಣದ ಒಗಟು!
ಅರ್ಥವಾಗದ ಜೀವಕೆ
ಬಲಿಯಾದ ಕ್ಷಣಗಳು
ಚಿಂತಿಸುವ ಪ್ರಸಂಗಗಳು
ಕೂಡಿಟ್ಟು ತಂದ ಈ ಒಗಟು!
ಒಂದರಮೇಲೆ ಒಂದೆನ್ನುತ
ದಿನ ದಿನವೂ ಮಿತಿಮೀರುತ
ಅದರದೇ ವೇಗದೊಳು
ಮುಂದೆ ಬರುವ ಆ ಒಗಟು!
ಬಿಡಿಸಲು ಹೋದೆ ನಾ
ಆ ಬಿಡಿಸಲಾಗದ ಒಗಟ
ಅರಿಯಲು ಹೋದೆ ನಾ
ಆ ಅರ್ಥವಾಗದ ಒಗಟ!
ಹೃದಯದ ಭಾರವ
ಕಣ್ಣಿನ ಪ್ರತಿ ಹನಿಯ
ಬಯಸಿದ ಅಕ್ಕರೆಯ
ಹಿಡಿದಿರುವ ಒಗಟ!
ಯೆದೆಬಡಿತವ ಹೆಚ್ಚು ಮಾಡುವ
ಕನಸುಗಳಿಗೆ ಕಡಿವಾಣ ಹಾಕುವ
ಜೀವನವನ್ನು ಪರಿಚಯಿಸುವ
ಒಗಟಿನ ಪ್ರಶ್ನೆಗಳು!
ಕಂಡೆ ನಾ ನೋವನ್ನು
ದೂರದ ಆ ಬೆಳಕನ್ನು
ಕಾಣದ ಪ್ರೀತಿಯನ್ನು
ಮುಚ್ಚಿಟ್ಟ ಆ ಒಗಟಿನಲ್ಲಿ!
ಇರುವೆ ನಾ ಒಗಟಿನ ತುದಿಯಲ್ಲಿ... ಉತ್ತರವಿಲ್ಲದೇ, ಪ್ರಶ್ನೆಯಲಿ!
ಶ್ರೀ
